منقوع المره+ الصبره + فيتامين E + موية ورد للنظاره والتصفيه

شوفي طريقتها عند الحجازيات بالضبط
انا اخذتها منهم ومعروفين الحجازيات ان الاشياء هذي توصلهم قبل العالم
لانهم ملتقى حضارات العالم لزوم الحج والعمره

المقادير :

قد حبة القهوه مره
نصف حبة القهوه صبره
حبه وحده فيتامين E تلقينه في الصيدليه
ولو لقيتي السائل خذي ملي واحد .. يعني عبي الشفاط مره واحده بواحد مل
نص كوب ماء ورد القرشي .. ترى القرشي افضل موية ورد لانها طائفيه
انقعيهم ثلاث ايام في علبه قزاز غامقه ( تصلح علب الادويه الفاضيه ننظفها قبل وننشفها )
في مكان تحت عينك
علشان كل ماشفتيها احركيها بملعقه صغيره ماتكون خشب ولا بلاستيك
ملعقة الشاي الالمنيوم مره زينه
بعد ثلاث ايام صبيها في علبه بحيث ماتنفتح كل ماجيتي تستعملينها
زي الي بصورها لكم .. لانها تتلوث وهذا سر ان بعض البنات
تقول استعملت المره او المنقوعه وطلع فيني حبوب
او مدري ايش .. لانها تحط القطنه في نفس الكميه فتلوثها ..
وهو المفروض لا .. اضغطي على قطنه وامسحي وجهك كل ليله
لابد من التقيد
وربي وحده عزيزه علي جدا استعملتها عقب حبوب شباب وكلف ونمش غير طبيعي
في اربع شهور صفت بشرتها كانت تحطها في الليل
وللآن تعاملها كل فتره علشان تصفي
وتغسلها بصابونه شيرازيه الصبح وترطب بكريم اولاي التوت البري
وعطتني طريقتها قلت استفيد وافيدكم
واحصل منكم لي دعوه